يعني ايه ثورة 25 يناير ؟
يعني ثورة مصرية زيرو
يعني اول ثورة تخلص في 18 يوم بس
وتحتاج 18 شهر عشان تخلص الفترة الانتقالية !
يعني اول ثورة تسقط رئيسها
ومتقتلوش ومتمشهوش وتحاكمه
على ان تكون المحاكمة نزيهة والحكم فيها الاعدام
يعني ايه ثورة زيرو ؟
يعني الدول الاوروبية تجمد اموال مصر المنهوبة في ارصدتها
ومصر متطلبهاش حتى الآن
يعني رموز الدولة يبقو متعاقبين في مكان انت بتحلم تقعد فيه
يعني ايه ثورة زيرو ؟
يعني تلاقي بعض شهداء التحرير عمرهم ما راحوا التحرير اصلاً
يعني وقت دفع تعويضات لقتلى التحرير
تلاقي انه عدد الشهداء بقى اكبر من اللى كانوا في التحرير اصلاً
يعني ايه ثورة زيرو ؟
يعني مليونات كل يوم
يعني اعتصامات كل اسبوع
ولو فاتك ثورة الغضب الاولى استنى التانية
يعني ايه ثورة زيرو ؟
يعني السكة الحديد تسرق من التحرير الرقم القياسي في عمل الاعتصامات والمظاهرات
يعني الناس تعمل ثورة عشان تقلل طوابير العيش والانابيب والمصالح الحكومية
فتزيد عليهم طوابير العربيات في البنزينة
يعني ايه ثورة زيرو ؟
يعني الناس في اول 2011 تهتف
الجيش والشعب ايد واحدة
وفي نص 2011 محاولة التصالح
الجيش والشرطة ايد واحدة
وفي اخر 2011
الجيش والشرطة ايد وسخة
جايز الشعب هو الايد الخفية او الطرف التالت ؟
يعني ايه ثورة زيرو ؟
يعني بعد ما كان اقل عسكري شرطة يمشي في الشارع نافخ ريشه
بقى ظابط الحرس الجمهوري بيخبي البطاقة بتاعته عشان ميتعرفش!
يعني تلاقي الناس بقت بتهرب من المناصب من تدني المعاملة معاهم
يعني ايه ثورة زيرو ؟
يعني بعد ما كنت بتخاف تعدي من قدام مبنى المحافظة
بقت المحافظ بيخاف يروح مكتبه من كتر الناس المعتصمة هناك
يعني في سنة واحدة بس تعدي علينا بتاع 8 حكومات مختلفة
ويتغير المحافظين مرة واتنين وتلاتة
يعني الحزب الحاكم يبقى محظور من انتخابات مجلس الشعب
والجماعة المحظورة تبقى الحزب الحاكم بأغلبية مجلس الشعب !
يعني انتخابات مجلس الشعب تاخد يومين ويكون الاقبال فيها عالمي
وبعدها بشهرين في انتخابات الشورى ميكملوش نص يوم والباقي فاضي
يعني ايه ثورة زيرو ؟
يعني تبقى فاهم ان ثورتك خلصت قبل تونس
وتشفق على طول الحرب بتاعت ليبيا
وتكتشف إنهم سبقوك وانت اللى متأخر !
يعني تلاقي طوابير الترشحات الرئاسية بقت اكبر من طوابير العيش نفسها!
وهي دي مصر وربنا يعينها علينا .....
