انتخابات الرئاسة
المصرية
حاجة اخر جنان
اقوى مرشح عالساحة
تطلع امه م الامريكان
تدور على مرشح تاني
متلاقيش غير الاخوان
المرشح بتاعهم موجود
والاحتياطي بتاعه للضمان
محدش فيهم عجبني
قلت ادور كمان
مسكت الفانوس السحري
وقعدت ادعك كمان
فضل يطلع دخان كتير
وظهرلي واحد اقرع
وبسنان
- قالي مفيش قدامك غير
واحد
انتخب الجنرال عمر
سليمان
قلتله بس ده مش نازل
- قالي يعني هو كان نازل
الاخوان ؟
انا مش عايز حد
من النظام
- امال هجيبلك حد م
اليابان ؟
- الناس كلها تبع
النظام
مش عاجبك شنطتك
وعالسودان
بس انا مش سايب مكاني
ولو حصل التحرير حيكون
مليان
ضحك ضحكة مقعرة وقالي
- رووح روّح انت لسه عيل
غلبان
- سنتين اجازة الثورة نسوك
وافتكرت نفسك سوبرمان
بصيتله بغضب وقلتله
هو حرام اطلب اني اعيش انسان
حقوقي بقت شوية اماني
وكل اللى انا طالبه
الامان
مش حقدر اتحرر من
العسكر
ومن هيمنة المشير ومن الفريق
عنان
شاورتله وقلتله بكل ثقة وقلتله
اوعى يغرك المواطن
الغلبان
لو رضيت تكون اسير
فانوسك
انا مش حفضل كدا زي زمان
انا المصري المعروف
بجبروته
مبيقفش قدامه ظلم او
طغيان
فجأة الدخان اختفى
ولقيت نفسي حيران
ببص لقيت دولابي
وانا على سرير نعسان
صحيت من نومي بسرعة
واكتشفت اني لسه قاعد جعان
قلت الحق بقى اقوم
اجمع توكيلات لعمر
سليمان
