(قصيدة) حكاية ثورة - الجزء الثاني

قالولنا نجرب قالولنا نشوف وبلاش تهويل النظرة
ازاي عايزين تقارنو بين الفلول وبين الثورة
بدأنا نميل بدأنا نقرب بس لسه باقية خطوة
لقينا خطةالـ100 يوم ولقينا مشروع النهضة
فاز مرسي مش بأغلبية لكنه عدى النص بشوية
مرسي خلاص رئيس شرعي مصر وصلت العالمية
اول رئيس شرعي منتخب مصر بقت ديموقراطية
خلاص بقى حنشيل العسكر وخلاص حنشيل الدستورية
مرسي بيشكّر في حكم العسكر وبيحلف اليمين للدستورية

امال كلام قبل الرئاسة ده كان مهلبية ؟

قلنا مرسي حيظبط الدنيا ومع الوقت حينجز العملية
ادولو فرصته يا جماعة ده لسه ماسك من شوية
اخيراً عملها الوحش وشال قيادات المجلس العسكرية
قلنا اخيراً حيحاكمهم ام عطاهم كام ميدالية

امال كلام قبل الرئاسة ده كان مهلبية ؟

قلنا اهو .. بردو نقدر للعسكر موقفهم ايام الثورية
الأهم دلوقتي تطهير القضاء وهي دي القضية
قالولنا حيشيل النائب العام وحيقلبه زي ما عمل في العسكرية
قلنا يا مرسي يا جامد يا بطل انت فعلاً قد المسؤولية
قالولنا حنبعتوا سفير للفاتيكان هما فاكرينها لعبة ؟
رفض المنصب وفضل مكانه واتهزت صورة الرئاسية
وطلعوا بيان وقالولنا : مطلعاش قرارات ترقية 

امال كلام مؤسسة الرئاسة ده كان مهلبية ؟

ما علينا خلينا في المهم عايزين مؤسسات حكومية
اخيراً شكلنا حكومة جديدة نص فلول ونص ثورية
ميهمش نظام قديم ولا نظام جديد المهم المعيارية

امال كلامكم عن عدم تمكين الفلول ده كان مهلبية ؟
خلينا فالكفاءة يهمنا الدراية مش حتفرق معانا الفلولية
اخيراً عملنا وزارات اخيراً شكلنا الحكومة الثورية
خلاص بقى اللى فات مات وحنطبق العدالة الانسانية
حنعمل محاكمات وحنطلع قوانين وحنطبق العدالة الاجتماعية
يلا يا مرسي فين محاكمة رموز البطلجية
شهر اتنين تلاتة مفيش اي اخبارية
فجأة افتكر .. حنعيد المحاكمات بس لازمن اعلانات دستورية
لازم احصن قراراتي واتنصل من السلطة القضائية
ايه يا ريس احنا حنحاكم بجد ولا حنقضيها محاكمات ثورية ؟
مكنش له لزوم التعب طيب وكنا عملناها من بدري وشوية
مش مشكلة الاعلان .. المهم نحاكمهم يلا نستحملهم شوية
ال100 يوم خلصوا يا ريس ومشفناش لسه اي حاجة
ما تصبروا شوية يا جماعة هو معاه عصاية سحرية ؟

بس الراجل كان واعدنا هو ده كان تبع المهلبية ؟

ما علينا خلينا ف بلوتنا فين المحاكمات بقى عايزين نشمت شوية
قالولنا مفيش ادلة جديدة ومفيش تعاون من الداخلية
مش ده موضوعنا دلوقتي عايزين نشوف التأسيسية
اصل دستورنا متأخر وده بيعطل الانتاجية
شهرين بالظبط والدستور يخلص وننزل في الاستفتائية
طب الاعلانات والمحاكمات والنائب العام فين م العملية
مش لازم تفكر دلوقتي احنا الادرى بمصلحتك الوطنية

امال الكلام اللى فات ده بردو كان مهلبية ؟

ده فساد 60 سنة ادوله فرصة 60 شهر وشوية
قعدت حسبتها لقيتها اكتر من الفترة الرئاسية !
انا اللى مش فاهم لازم اسمع الكلام ده كلو لمصلحتي الوطنية
اضربت غزة وانتفض الريس ايوه كدا الوطنية
خطاب صريح جريء للعدو بكلمات عنفوانية
عشرين طفل في تلات ايام دي قضية فعلاً اجرامية
مفيش يومين حادثة مزلقان اسيوط باطفال الازهرية
خمسين طفل في تلات دقايق كانوا هما الضحية
زمان في نفس الموقف انت ثورت وطالبت بقرارات فورية
يلا يا ريس جاتلك الفرصة خدلك قرارات حسمية
حاسب عاقب ابعت تابع اللى حصل ده مش شوية
حالات الاصابة عمالة بتموت مش لاقيين كفاية ادوية
ياريس ابعت ربع قافلة من بتوع غزة بردو بلدك ليها اولوية
خطاب بارد من عالكرسي بيعزي فيه اهالي الضحية
فين الحساب في العقاب فين القرارات الفورية
المشكلة مش ذنب الحكومة منتا نايم في العسلية
ده خطأ عامل المزلقان وهو اللى حيشيل القضية
حنخلص خلاص الدستور والاستفتاء خلال الايام اللى جاية
ايه يا مرسي احنا مش قلنا شهرين على ما تخلص التاسيسية ؟

ولا الكلام ده بردو كان مهلبية ؟

لازم نلحق ننجز عشان اعداء النظام والمؤامرات المستخبية
الناس هاجت وماجت وقاموا يعتصموا قدام الاتحادية
نزلوا الجماعة يفضوهم انتو خدتوا مكان الداخلية ؟
اتضربوا واتقلعت خيامهم واتهانوا عشان الحرية
فين حق التعبير والرأي وفين حق السلمية؟
ولا الكلام اللى فات ده كمان كان بردو مهلبية ؟

محدش يعترض محدش يتكلم رئيسكم بشرعية دينية
كلهم بيوقعوا النظام وكلهم ضد المصلحة الوطنية
بس دول شباب عادي وبيموتو في سبيل الوطنية
بس انت اقعد ساكت احنا ادرى بالمصلحة الوطنية
اي تظاهر قدامنا ده ضد الشريعة والشرعية
كلهم بينفذوا المخطط الكبير لصالح المؤامرة المستخبية
يادي ام المؤامرة دي حتعملي ازمة نفسية
حعمل نفسي مصدق واكمل معاهم في المعدية
صحيح مش شايفلها بر بس حيظهر لقدام شوية
 خلصت 2012 بمصايبها وربنا يسهلها السنة اللى جاية 

كلمات محمد علي خضر

كتبت الكلمات عقب نهاية عام 2012

يتبع .....