إعلانات

مدونة أعمال الفنانة رشا رزق إبدأ البزنس الخاص بك وابحث عن عمل لك من خلال المنزل

2020/06/29

البنات والتكنولوجيا


تعامل البنات مع التكنولوجيا دون وعي هو كارثة زمنية هائلة

لما تبقي عاملة اكونت فيس ومبتعرفيش تغيري في اعدادات الخصوصية فدي مصيبة 
لما تبقي رافعة صورك مع صحباتك وحطاهم في البوم مغلق ومتصورة مفيش جن حيجيبهم تبقى مصيبة 
لما يبقى اللاب بتاعك مليان احصنة طراودة وباتشات والجهاز ملغم وسايبة فيه كل خصوصياتك كدا تبقى مصيبة
لو بعتي موبايلك بعد ما عملتيله فورمات ومتصورة ان الداتا اللى عليه مستحيل ترجع تبقى مصيبة 
لو فاتحة كل ابلكيشنز تحديد المواقع والبلوتوث والواي فاي وداخلة على مليون برنامج ومتوقعة مفيش حد حيوصل لموبايلك الاندرويد ولا حيعرف تفاصيلك ايه تبقى مصيبة

إليكي .. أهم قواعد التعامل مع الانترنت ...

1- مفيش صورة بتترفع عالنت محدش حيعرف يجيبها .. مهما كانت ايه !
2- متبيعيش ابداً موبايلك القديم لاي حد لان في برامج كتير ممكن ترجع الملفات المحذوفة .
3- متتصوريش صور خاصة كتير عالموبايل لو مكنتيش واثقة انك حتعرفي تقفليه وترجعيه في حالة اتسرق او اتنشل او حتى نسيتيه في التاكسي !
4- الاندرويد قتل الخصوصية في كل حاجة ... مش كل حاجة حتعجبك فيه تنزليها وتشغليها 
5- جهاز اللاب توب الشخصي يتنضف (من الفيروسات) اول بأول ومتفتحيش لينكات متعرفيهاش !
ولو عندك حاجات شخصية اوي يفضل تتحط في هارد خارجي تحسباً لو احتجتي تسيبي جهاز لحد يصلحه.
6- غطي كاميرا اللاب توب بورقة لو مش بتستعمليها (او بتستعمليها) لانه وارد الكاميرا تتفتح دون علمك
وتتصوري من وانتي ف اوضتك !

من الاخر ... متأمنيش للتكنولوجيا ابداً .. الواحد كل يوم بيتعلم وبيكتشف بلاوي جديدة
اللهم استرنا واحفظنا

‫#‏التكنولوجيا‬ و ‫#‏الخصوصية‬
#بنزريات

2020/04/04

مستقبل ايه اللى أنت جاي تقولي عليه !

Buy Surviving Mars - Deluxe Upgrade Pack - Microsoft Store en-CA

حضرتك انا دخلت الثانوية ، لقينا أكبر نسبة انتحارات حصلت السنادي
اللى نجا منه ومنتحرش دخل هندسة من مرحلة تانية !
بعدين قولنا مش مشكلة المهم دخلنا الكلية
😇
خلال مدة الكلية حضرنا 2 رؤساء جامعة و3 عمداء كلية و4 محافظين و 5 رؤساء جمهورية وحاجة وعشرين حكومة مختلفة على شوية اعتقالات وقنابل غاز مسيلة جوه الجامعة ، صراحة مكناش نقدر نروح قبل ما ناخد جرعتنا منها
اللى نجا مننا ومماتش ومباتش في الحجز واتخرج عادي كدا قولنا بقى نشتغل ، ملقيناش شركات لسه موجودة في البلد
☹️

قولنا ناخد كورسات وتدريبات على ما ربنا يفرجها .. واشتغلنا .. احمدك يارب أخيراً هنقبض ونحقق أمنياتنا هوب إعلان تعويم الجنيه .. هوب الاسعار اتضربت في تلاتة !
😟
خلاص مش لازم كاميرا جديدة .. مش لازم لاب جديد .. مش لازم موبايل جديد هنحاول بس نعيش ، اللى نجا مننا ومنتحرش وحاول يشتغل ويحوش
قرر أخيراً انه يستقر ويتجوز بقى .. هوب الكورونا تضرب العالم !
😩

مستقبل ايه اللى حضرتك عايزني أبنيه ؟ احنا بنحاول نـ Survive من ساعتها ومش عارفين !
😭

مواليد أوائل التسعينات
#بنزريات

2018/08/13

إنتحار كريتيف !


الجماعة اللى تعبوا من الدنيا وشايفينها سواد وكل يومين بوست عايزين ينتحروا وكفاية كدا
بص بقى يابني انت وهي
لو انت ناوي عالانتحار بجد .. فأحب أقولك يا ولدي توكل على الله ومتشيلناش بقى همك معانا 
أصل يعني لما انت مش مستحمل ربع قرن من الزمان اللى نصه كان ابوك وامك اللى شايلين همك فيه ، حتعمل ايه في الربعين التانيين اللى أنت اللى حتشيل همهم فيه !
بس يعني خليك كريتيف وانت بتنتحر 
يعني جو ترمي نفسك من الدور السادس او تنط قدام المترو ده بقى ممل ومش حتفرق مع حد ف حاجة 
أعمل حاجة جديدة واستمتع بيها .. اه زمبقولك كدا
جرب مثلاً تواجه مخاوفك وتجري ورا كلب سعران .. اكيد مش حتخاف تموت 
او تسافر أسوان وتنط في بحيرة التماسيح وتبقى جربت مغامرة جديدة 
أو خد عجلة واجري بيها ف الشارع بأقصى سرعة في عز الفجر في الهوا وانت مغمض .. وانهي جولتك في اي منطقة امنية او عسكرية قريبة حيثبتوك حتنفضلهم حيصفوك وتبقى شهيد ومش بعيد تتخلد ذكراك وتتنشر صورك وتاخد تعويض كمان
الأفكار كتير يا جماعة بس انتو مش كرييتيف خالص .. إفلاس فكري حتى في الإنتحار
جاتكم الـ .... جرفتونا :D

2018/07/13

شمس وقمر !


فلكياً : الشمس هي مركز الكون .. والقمر مجرد تابع
رياضياً : الشمس أكبر حجماً بأضعاف عملاقة من القمر
فيزيائياً : الشمس هي مصدر الطاقة والدفئ .. القمر مبيوفرش أي حاجة
كيميائياً : الشمس سبب تفاعلات وتغيرات كتير بتحصل .. القمر مبيعملش حاجة
تاريخياً : الشمس عمرها أطول من عمر القمر سواء ف النشأة او حتى ف المستقبل
دينياً : الشمس طول عمرها المعبود الاعظم لحضارات كتير عكس القمر

يعني من الآخر عملياً كدا .. الشمس أعظم شأنا من القمر تقريباً في كل حاجة
وبعد كل ده لما تحب تعاكس بنت حلوة ولا تهشتك بنوتة صغيرة بتقولها ازيك يا قمر
قال يعني كدا بتمدحها
طيب تخيل بقى لو روحت قولت لصاحبتك ولا لخطيبتك ازيك يا شمس ! (وده المنطقي)
بنسبة 90% حتفسخوا ده لو متفتحلكش تحقيق .. مين بقى شمس دي اللى انت تعرفها كمان !
وده رغم إن حتى لغوياً : القمر مذكر بس الشمس هي المؤنث !

اللى بيفكر
بعقله .. شايف ان كل واقعنا الحياتي من ضوء وطاقة وجاذبية معتمد على وجود الشمس
واللى بيفكر بمشاعره .. شايف ان القمر هو الأبيض والأحلى وبيستكين ليه في الليالي البدرية

ده إسقاط مصغر على واقعنا اللامنطقي في تعاملاتنا مع البشر
مابين المنطق والعرف ، الجوهر والمظهر ، الحلاوة والروح ... وغيرها كتير 



#بنزريات

2017/07/20

اخلع نضارتك

.
..
...
مش لازم تشوف الناس .. مش لازم تشوف تفاصيل الشارع
مش لازم تتخنق من الزحمة .. مش لازم تشوف الزبالة
مش لازم عينك تقع على اشكال بني ادمين ملهمش ملامح
النضارة بتخليك تشوف تفاصيل انت في غنى عنها
تشوف تفاصيل مشاكل الناس التانية وتسيب مشاكلك انت
بتخليك تشوف سواد الدنيا وبؤس الحياة على وشوش الناس اللى قدامك
أحياناً بيبقى من الأفضل إنك تمشي من غير نضارتك لبعض الوقت
ارتاح من تفاصيل الناس .. ارتاح من تفاصيل الدنيا
أنت اللى بإيدك تختار
حتفضل ماشي بالنضارة .. ولا حتدي نفسك الفرصة تغير لبعض الوقت
:)

2016/10/28

أعطنا مما أعطاك الله !!

كنت أقوم بتوزيع عدد من "شنط رمضان" في أحد قرانا بمركز (أبنوب)

وإذا بهذا الرجل يفاجئني بصوت أجش على مدخل الجمعية

- ده مالك ولا مال الله ؟ 
= مال الله .. !
- طيب .. ربنا قالك إذا كنت على فرس وأتاك سائل أن تعطيه من مال الله لازم تديه !
= ده قالي فين ده ؟ ف آية ولا ف حديث يعني ؟
- روح دور وانت تعرف !!
= طيب .. عامة انا على رجلي مش على فرس ولا حاجة .. ^_^

دخلت إلى الجمعية لأرتب ورقي بينما الافواج متجمهرة على باب الجمعية
يريدون أن يأخذوا نصيبهم من "مال الله" !

ثم نظرت إلى هذا الرجل مرة أخرى وأذنت له بالدخول 

= تعالى يا حج ..
- ايوه نعم ؟
= تعرف انا لو مشيت بالمبدأ بتاعك ده ؟ انا مكنتش حنزلكم البلد دي أصلاً
- ليه ؟ عشان احنا وحشين ؟
= ده سبب تاني لكنه مش السبب الاساسي .. انا لو اديت كل حد جه طلب مني حاجة
فأنا لن أخرج حدود مدينتي ابداً .. لإني مش حقدر أكفيهم كلهم
فايه رأيك ؟ ادي كل حد يقابلني بغض النظر عن مستواه ولا نتوسع وندور عالمستحق اكتر ؟
- (مطرقاً عينيه ف الارض) صح يا استاذ لا لازم ندور ونلف طبعاً
= طيب .. اتفضل برا بقى :D