إعلانات

مدونة أعمال الفنانة رشا رزق إبدأ البزنس الخاص بك وابحث عن عمل لك من خلال المنزل

2015/11/19

إرهاب فرنسا

إلى كل أحمق متضامن مع ضحايا الإرهاب على فرنسا 

ويضع علم فرنسا مع الحداد في بعض الأحيان !

أرفض وانبذ العنف ... فهو ليس من صفاتنا 
ولكنني لن أتعاطف مع دولة صاحبة اكبر احداث تعصب
وجرائم ضد المسلمين !

كم مرة تعاطفت مع المئات التي قتلت من وطنك ؟
كم مرة تعاطفت مع الالاف التي قتلت في الدول العربية ؟
كم مرة تعاطفت مع الملايين من المسلمين الذين يذبحون في كل مكان بالعالم ؟

تذكر جيداً ... بمن عليك أن تهتم !

2015/09/16

العمر .. مسؤولية !


فكرة إني مازلت على قيد الحياة .. هي فكرة مخيفة في الواقع
فكوني مازلت حياً .. فهذا يعني أن الله لا زال ينتظر مني المزيد
هذا يعني أن مزيداً من المسؤوليات سيلقى على كاهلي
هذا يعني مزيداً من إجابة سؤال "عن عمرك فيما أفنيته؟"

ربما تكون هذه فرصة لأكفر عن ذنب قد مضى ووقت قد اهدر وحقوقاً لم اؤديها
ولكن ما مضى قد مضى .. ولازال الحاضر موجوداً بما له وما عليه
ومن المبالغة أن تظن أنك قد اكتفيت أو فعلت ما بوسعك
فإن كنت قد انتهيت ... لما كان هنالك سبباً يبقيك

اعمل لدنياك كانك تعيش أبداً .. واعمل لاخرتك كإنك تموت غداً

2015/09/01

آفة التطوع

آفة التطوع .. ‫#‏الاختلاط‬

لا تكونو كالذين اخبر عنهم الله عز وجل قائلاً 
"قل هل ننبئكم بالأخسرين أعمالاً ؟ الذين ضل سعيهم في الحياة الدنيا وهم يحسبون انهم يحسنون صنعاً "

الاختلاط بنسبة 90% هو ضار وليس نافع 
الـ10% المتبقية تتم في حالات خاصة قد لا يتعرض لها غالبيتكم
فمابال الاختلاط في التطوع ؟!

صار التطوع لنا قناة مباحة في الاختلاط الغير مثمر
من ضحك وهزار وخروجات ثنائية وانشطة وهمية
وما يتطور إلى سؤال عن الاهل والحال والمباركات في المناسبات والهدايا في اعياد الميلاد

محدش فينا بياخد باله من ده ... او عاملين مش واخدين بالنا من ده .. او ماشيين مع التيار وخلاص
ولا أنئى بنفسي عن بعض ذلك 
فإذا أمنت الألفة ، رفعت الكلفة .. واذا رفعت الكلفة صار الأمر عادة 
والعادة .. تميت كل الحدود

لسنا بمنأى عن الخطأ او المعصية
لكن حذاري ان يكون "شغل ربنا" في "معصية ربنا" !!

  اللهم عافنا من ان نكون الخاسرين اعمالاً .. وطهر نفوسنا من كل دنس :)

2015/08/08

كلمات كورال أغنية تحيا مصر

كلمات أغنية (تحيا مصر) في حفل افتتاح قناة السويس الجديدة
بتاريخ 6/8/2015
التي غناها كورال للأطفال



بلادي .. بلادي 
نشيد بقوله كل يوم وانادي
باسمك انتي والعلم قصادي
ياعمري كله يا شهادة ميلادي
فداكي حياتي يا حب عايشه جيل من بعد جيل

 تحيا مصر كلمة قالها كل مصري بانتصار 
 تحيا مصر وكل جندي عاشلها ليله ونهاره 
 حتناديني حتلاقيني تحت امرك 
 عمري مش حيسوى حاجة جنب عمرك 
  انتي اغلى حاجة عندي حبي واصل منتهاه 

 النهاردة وقلنا .. نتحدى اي صعب للنهاية  
 اخلصنا في العمل وفي النوايا 
 واديلكو على اول البداية 
 ولادك شبابك حيشيلوا عنك الحلم الكبير 

 تحيا مصر كلمة قالها كل مصري بانتصار 
 تحيا مصر وكل جندي عاشلها ليله ونهاره 
 حتناديني حتلاقيني تحت امرك 
 عمري مش حيسوى حاجة جنب عمرك 
  انتي اغلى حاجة عندي حبي واصل منتهاه 

تعالوا وشوفوا هدية مصر للعالم بحاله
لو رايح ولا جاي سهلنهاله
دلوقتي والمسافة حسبنهاله

2015/08/06

عليك بالماء .. محور التنمية

#الشقيري || الموسم الاخير || الحلقة 16 عليك بالماء




في مشهد مؤثر من الحلقة ..

مجموعة اطفال شايلين الجراكن وبيقطعوا مسافات طويلة عشان يملوا المية من اقرب بير ويرجعوا نفس المسافة تاني مسافات بالساعات .. حتى الشقيري ف كلمة ليه كان بيقول
" بدل ما الاطفال يكونو في مدارس قاعدين بيتعلموا علم يفيدو بلدهم .. قاعدين يجيبو مية ! "

تخيل لما نبقى في القرن ال21 والواحد مش ملاحق سرعة العصر ولسه في ناس عايشة تجيب مية بس عشان تعيش !
طبعاً هو الموضوع جه صدفة اني كنت بتفرج عالحلقة النهاردة ف يوم الافتتاح
فملهاش لازمة إني اتكلم عن سيناء وحفر الابار في سيناء واللى كانوا بيقللوا من اهميته كعمل تنموي
لان خلاص الناس دي بقى عندها قناة مش بير ولا اتنين فمش حياكلوا مصر يعني :D

بس حقيقة يعني ... ازاي احنا عايزين نعمل نهضة بشعب اكتر من نصه بيدور بس بيدور على مقومات الحياة ؟
بعيداً عن افتتاح القناة .. يعني يارب نطلع مش فاهمين ونشوف مشاريع كتير مستقبلاً عالقناة وتساهم في تنمية محور القناة ومحدش بيرفض الخير 
لكن لسه احنا لينا دور كبير .. مش حينفع نحاسب واحنا بنتفرج .... لازم نكون الجزء الاكبر من محور التنمية

2015/06/03

#خليك_إيجابي

اتعلم تبقى ايجابي

شير البوستات المفيدة وفيد بيها غيرك .. وقلل من البوستات التافهة
انتقد - ايجابياً - وامدح الناس اللى تستحق النقد واتكلم عنهم .. خلي الكل يعرفهم
دور عالشخصيات الايجابية وابتدي اقرالهم .. او اسمع لكلامهم

ممكن تتطور اكتر وتبقى ايجابي بعيداً عن الفيس كمان 

ابتدي خد مبادرات وجمع الناس حواليك في انكو تعملوها 
قول عالغلط عظم اول ما تلاقيه وامدح اللى عمل الصح عشان يعمله تاني
خد دايماً الخطوة الأولى وجرب حاجات مجربتهاش واتعلم حاجات جديدة

اتكلم دايماً عن المواقف الكويسة ... عن الناس الكويسة ... عن الخير 
الدنيا بتختلف تماماً حسب ما احنا بنشوفها ازاي


‫#‏خليك_إيجابي‬

‫#‏فيها_حاجة_حلوة‬
‫#‏الدنيا_لسه_بخير‬

موقع ملوش لازمة !

الفراغ أحياناً بيكون قاتل .. قاتل لدرجة إنك تعمل موقع كامل ملوش اي تلاتين لازمة :D

ده لينك موقع بيجيبلك شوية مواقع ملهاش اي لازمة

من ضمن المواقع دي اخترتلكم كام موقع كدا
دول اكتر المواقع اللى ملهاش لازمة تسلية


http://www.nullingthevoid.com
ده ممكن تديه لطفل صغير يتسلى فيه

http://www.pointerpointer.com
ده بيشاورلك عالماوس في اي حتة حتسيب فيها مؤشر الماوس بتاعك

http://iloveyoulikeafatladylovesapples.com
دي بتاعت الساحرة الشريرة ... جربها بنفسك

http://www.haneke.net
ده بقى لهواة الالغاز والتعقيدات
انت حتتفرج بس .. بس حتتفرج كتير
ومواقع تانية غيرها كتير كدا
لو عندك رفاهية الفراغ .. افتح واتفرج

2015/05/24

فاكرين .. لما كنا مغفلين

فاكرين لما قامت ثورة 25 يناير 
وفضلنا 18 يوم نتناقش حوالين مبارك مفروض يكمل الـ6 شهور ولا يمشي دلوقتي
فاكرين لما البرادعي فرح ورجع يكمل التغيير وقلناله يا عميل امريكاني يا خاين "روَح لامك"
فاكرين لما طلعنا بالمجلس العسكري السما السابعة ونزل بينا هو للارض السابعة
طب فاكرين الاخوان لما صدقنا انهم زاهدين في الحياة ومكانوش طالبين سلطة فنزلوا بـ2 مرشحين بس
فاكرين ابو الفتوح لما انشق عن الاخوان وقلناله بس يا كداب انت "خلايا نايمة"
فاكرين البرلمان ومهازل اعضاء مجلس الشعب وقد ايه الموضوع كان مسرحية اكتر منه تشريع !
فاكرين فلسفة الدستور اولاً ولا الانتخابات اولاً لما فضلنا نهري فيهم واحنا مش عارفين اي فرق بينهم
طب فاكرين حازم ابواسماعيل لما صدقنا ان امه امريكية ونزل عمر سليمان عشان يطلعه من الانتخابات !
فاكرين جبهة الانقاذ الوطني لما بقى عمرو موسى راجل "وطني" وتاريخه يشفعله لمجرد اتفاق المصالح
طب فاكرين صباحي رمز "النسر" لما قالناله يابو وشين .. حمدي صباحي وحمدي "مسائي" 
فاكرين السيسي لما بقى وزير دفاع وقلنا عليه اخوان ف الوقت اللى الاخوان كانوا بيكبروله
فاكرين مرسي لما استغل التأييد الشعبي عشان يغير بالاعلان الدستوري وقلناله لأ يا مستغل السلطات
فاكرين لما كنا فرحانين بان مبارك خد مؤبد ومستنيين الاعدام واتعادت محاكمته من جديد عشان ياخد  براءة
فاكرين مرسي في الاستاد لما صدقنا انه بيمجد في انجازات 6 اكتوبر وهو جنبيه قتله السادات 
فاكرين علاج الايدز بالكوفتة
فاكرين رجالة قواتنا المسلحة اللى زي الدهب
فاكرين 30-6 لما طلع خطاب الـ48 ساعة وكان كل طائفة نزلت ف الشارع فاهمة انه في صفها 
فاكرين قد ايه رابعة أثرت فينا ونسيتنا دم ناس اكتر منهم كنا بعنا دمهم من زمان عشان المصالح
فاكرين باسم يوسف "الاراجوز" لما كان حلو ايام مرسي ؟
فاكرين الاعلاميين كلهم .. لما بيقولو الكلمة وعكسها .. وبنصدق الاتنين !
شعب مغفل بطبعه .. بالاعلاميين بتوعه 
شعب مغيب من زمان .. مش من دلوقتي بس 
شعب فتّاي وبيهري في اي حاجة ... وملوش فيها
هيييييييييح .... اللهم هداية :)

2015/05/18

دكتور الذرة الوحيد !

6-4-2014

كان ذلك منذ حوالي العام 


كنت في طريقي من الجامعة إلى الجمعية
وصلت مع صديقي إلى هناك حيث كان الشباب يجهزون الاشولة
لنقل الملابس بالتروسكل إلى أحد القرى لعمل معرض هناك
حيث استوقفهم رجل مسن بالبدلة يبدو عليه الوقار
يسكن في المنزل المقابل
ويستفسر عما نفعل

أعلمناه بأننا كجمعية خيرية نجمع من التبرعات الملابس والكتب والادوية
ولدينا عدة مشاريع وما الى ذلك من تفاصيل
فقال (بصوت متلهف) ..  تعاااالوا


عندي هنا كمية كتب كتيرة جداً في علم الذرة محدش بيعمل بيها حاجة
اصل انا دكتور علم الذرة الوحيد في جامعة اسيوط
وزي منتا شايف الواحد حالته عاملة ازاي
عشان تعرف بلدك بتعامل الدكاترة ازاي

( تخيل موسيقى تصويرية )


زمان لما كنت لسه طالب
كنت بكره قسم الكيميا جداً
بس انا كنت جايب تقديري في مادة الكيميا
ولاني كنت عايز فيزيا ومش راضيين
فروحت حضرتها مع نفسي من بره

ورجعت عشان اتعين في قسم فيزيا
وبعد مناقشات مع العميد ورئيس القسم وكدا اخيراً اتعينت في فيزيا

كنت لسه عضو هيئة تدريس صغير وكنت عايز اتجوز وقتها
مكنتش عايز اخد واحدة من اسيوط فسافرت الزقازيق
وهناك اتعرفت على واحدة واتقدمتلها
وطلعت في الاخر اسيوطية بنت اسيوطي
ومع اصرار الاهل والوالدة وكدا مكنش قدامي غير اني اوافق

المهم في يوم كذا / شهر كذا / سنة كذا
كانت اول زيارة وتلبيس دبل
وفي يوم كذا كنا حددنا معاد الخطوبة
ويوم كذا .........
.
(شوية تفاصيل بيذكرها باليوم وبالساعة)

.
كنت عايز اجيب شبكة فسألتهم بتجيبو الشبكة بكام
قالولي بـ 5000 بس لينا كـ "استاف" او هيئة تدريس بتبقى 10000
طبعاً الرقم كان كبير بالنسبالي فروحت جايب اللى بـ 5000
فابوها اتخانق وازاي ومش ازاي المهم جبت في الاخر اللى بـ 10000

.
.
.
.

اما البيت اللى انا قاعد فيه دلوقتي
فالسقف كان بينقط مية عندي من الناس اللى فوق
ولما روحت اشتكيت في القسم وعملت محضر
اول ما عرفوا انه مسيحي راحوا قافلين المحضر تاني
وقالولي حنحلها ودي ومحدش عمل حاجة
.
.
.
بعد ما اشتكيت المرة التانية
الظابط كان واقف وبينادي علينا
فين محمد (الدكتور) .. ايوه اهو
فين (****) .. اهو يا فندم

ايه يلا .. مالك يلا .. مش عايز تعمله السقف ليه يلا
هي البلد فوضى ولا ايه وكل واحد بيعمل اللى عايزه ؟
انت بتشتغل ايه يلا ؟ ... خادم
يعني ايه خادم يلا ؟ ... قسيس !
(الظاب مرتبكاً في توجم)
منا قلتلك يا دكتور خلاص انت ممكن تعملها على حسابك
ويا (فلان) يعني الموضوع ممكن تظبطوه ودي بينكو بقى
وانتهت القصة دون جديد مرة اخرى
.
.
.
.
في يوم كذا شهر كذا كان طفح بي الكيل
الكلام ده سنة 83

روحت بقى امن الدولة
وشرحت للظابط الموقف كلو
وانه جاره اللى فوق مش عايز يخليه يصلح السقف
وشركة المية مانعة ان حد يقطع المية على حد
ومش عارف احل المشكلة
فالظابط اتنرفز واتخنق وقعد يقول
يعني ايه الكلام ده ؟؟ هي فوضى ولا ايه ؟؟
هو كل واحد حيعمل اللى هو عايزه ؟؟؟
دنا حطلع ****** اللى خلفوه
الموشحة دي كنت سمعتها قبل كدا كتير

المهم عملنا المحضر واول ما وصل لحد الاسم
لقيته راح قافل المحضر تاني
وقالي ياراجل المسيحيين دول غلابة واقلية وبتاع
واكيد حنحل الموضوع ودي

فإذا بالدكتور ينفجر في وجهه
منتو كل مرة بتقولولي نفس الكلمتين
واول ما تعرفوا الاسم تروحو واقفين وتقولولي ودي ومش ودي
لو معندكوش قانون يحل المشكلة دي
انا عندي 14 عم وعمة سيبونا نحل المشكلة دي بطريقتنا
المهم الظابط بدا يزعق والدكتور يزعق اكتر
راح الظابط قعد وراح مقعده ومهديه وابتدى يحكي معاه
مرات الظابط طلعت دكتورة معاه في القسم
وابو الدكتور طلع معرفة الظابط زمان
وابتدو الاتنين يهزروا مع بعض
والظابط قاله ياراجل دنتا طلعت معرفة يعني
لا كدا يبقى هاتلي الراجل ده وانا اطلعلك *****

المهم راحوا فعلاً لجاره اللى فوقيه واجبروه انه يتعاون في الموضوع

بعد حكاية استمرت لساعة الا ربع بخصوص البيت
واستمرار المشكلة دي لسنين

واحنا لسه واقفين قدام الجمعية تعبنا من طول القصة

كان كل موقف يطلعلنا ورق من الشنطة كاتب فيه التفاصيل دي
قلتله هي دي المذكرات اليومية  ؟
قالي لأ المذكرات في البيت .. ده الورق اللى كنت بشرح فيه الموقف اللى بقدمه للمحامي

وكل شوية يثبت كلامه بورق ف الشنط 
شوية ورق للمحامي .. شوية ورق للموقف اللى حصل مع الظابط
وشوية ادلاءات بمعرفش ايه 

اللطيف ف الموضوع انه شخص هادي جداً 
وان مراته هي اللى كانت بتعمل كل حاجة .. وهي اللى تتخانق وهي اللى تنسق مع المحامين
وهي اللى كانت بتجبره يروح ويعمل ويشتكي وكدا 
كانت ولازالت ست عفية (على حد تعبيره ^^)

المهم في نهاية القصة .. كان كل الناس اللى ف العمارة اللى هو فيها 
يا اما سافروا يا اما ماتوا .. ما عدا الراجل المسيحي اللى بيرشح مية عليه ده
ورغم ان السقف اتعمل بعد الضغط عليه .. بس مكنش معمول بذمة ورجع يرشح تاني
ووصل الموضوع انه في مرة سافروا ورجعوا لقيوا الشقة غرقانة !


عشان الفيلم ميفضل بنهاية مفتوحة كدا .. فالحوار كان لسه في قصص كتير تانية
من قصته وهو طالب لمعيد .. وانتقالاً لجاره وبهدلته من ظابط للتاني

كانت قصة الحرامي دي حمادة تاني خالص

في يوم من الأيام .. كنا مسافرين ومراتي روحت على اسيوط لبيتنا اللى هنا
وهي بتفتح الباب .. لقيت نور الاوضة جوه منور والشقة كانها ملعوب فيها !

اتصلت بيا وقالتلي الحق في حرامي دخل البيت 
قلتلها طيب شوفي كدا ايه اللى حصل ولو كان سرق حاجة نبلغ 

المهم ...
"وزي ما الدكتور كان بيحكيلنا" ... البيت يابني كان فاضي
الحرامي دخل الاوضة المقفولة ملقيش غير شوية كتب عن الذرة كدا كتير
وطبعاً هو مش مهتم بالعلم
لقيت مراتي بتتصل بيا بتقولي ... شوفت الحيوان عمل ايه ؟ قالها ايه ؟
قالتله دخل المطبخ وطبخ لنفسه ورمى الحاجة مغسلهاش !!


طبعاً هو بيحكي بتلقائية وعن تلقائيتها واحنا ميتين من الضحك 

الموضوع طول ... احنا لينا ساعتين بنحكي 
وناس تطلع وناس نزلت المعرض وناس تيجي 
بس انا فضلت مكمل ... الناس الاثرية دي مش حتقابلها كتير 

وما بين حكايات كتير كدا مستحيل افتكرها .. وصلنا ف الاخر لانه ابتدى يتعرف علينا 
قالنا اه منا لازم اعرفكو عشان ادونكو في اليوميات بتاعتي 
يااه .. انا حتحط في يوميات اقدم من عمري بـ 40 سنة مثلاً ولا 50 سنة ^^

صحيح هو كان بيختم معانا ف الكلام .. بس الختمة لوحدها خدت نص ساعة 
وهو لسه بيشتكيلنا من حال البلد .. وان قامات علمية زي حالاته ملهاش مكان ف البلد

يعني مثلاً رحت مرة دار نشر عشان اقدم فيها كتاب كنت عامله عن مجال الذرة 
مرضيوش يطبعوه ... قالولي مين حيشتريه ؟ ... لو عامله لفيفي عبده ولا صافيناز حنقولك ماشي !

يلا ... البركة فيكو بقى ممكن انتو تعملوا حاجة 
ربنا يكرمكو يا ولاد .. انا حعرف مراتي عليكو 
ثانية كدا ... انا معايا صورة ليها اورهالكو 


(فتح المحفظة وراح مطلع صورة قديمة ليها كدا ابيض واسود)
اهي دي صورتها ... حخليها تبقى تعرفوا وتجيلكوا ان شاء الله 
هي متغيرتش كتير عن الصورة دي غير انها بقت محجبة بس 
وانتو زي ولادي يعني ... هي ست عفية كدا ما شاء الله زي مانتو شايفين 


المهم الراجل سلم علينا ومشي ... وانا اصلاً كنت نسيت اول الموضوع كان بيتكلم عن ايه
ومش مصدق اني ليا ساعتين واقف معاه غير النص ساعة اللى ملحقتهوش فيها ف الاول

بس كنت مبسوط جداً إني كنت واحد من الاربعة اللى اتاخدت اسمائهم
عشان يحطنا في اليوميات بتاعته :-D

 #ذكريات_الناس_القديمة

2015/03/27

في احتفال براءة مبارك !

إنه السبت 29/11/2014


أي بعد 3 أعوام و9 أشهر و18 يوماً تماماً من يوم تنحي الرئيس في 11/2/2011

وحتى ذلك اليوم الذي أعلن فيه براءة المخلوع محمد حسني السيد مبارك من جميع ما وجه ونسب إليه من تهم



من السذاجة أن نعتقد بأن بأن رئيساً سلم السلطة بنفسه يمكن أن يحاكم بالإعدام

فإن كان مذنباً حقاً .. فلم يكن ليتركها قبل ان يسقط الالاف من الثوار وقبل ان يطمئن لاتلاف ادلة جرائمه

وإن لم يكن مذنباً كما يدعي .. فقد ترك السلطة وهو مطمئن لبراءته مهما انهالت عليه التهم والقضايا



عدد قتلى التحرير بالطبع لم يكن 238 شخصاً فقط كما يدعي البعض
ربما هو من تم التعرف عليهم ولكنهم بالطبع ليسوا اجمالي الضحايا
فكما اتذكر .. فالعدد شارف على الألف ولو كان فيهم مجهولو الهوية ومن ماتوا خطأً من المتفرجين أثناء الاشتباكات

وهي أرواح أيضاً وعلى أحدهم مسئولية قتلهم ... هذا بجانب من أصيبت أطرافه ومن اصيبت عيناه ومن بتر أحداً من اعضاء



بديهياً في اطلاق الشرطة النار على المتظاهرين .. ان معظم الضرب كان بالخرطوش ورش المياه
وهذا لا ينفي وجود رصاص حي في بعض الحالات التي لم تكشف للعلن ولكننا شهدنا اثارها

إذن فنظرياً .. لن يمكنك إثبات إدانة أياً من أفراد الشرطة في حوادث القتل في حالة ان معظمهم كان يدافع عن أقسام ومراكز الشرطة ومن السهل جداً ان تدرج معظم حوادث القتل تحت هذا البند

وبالتالي .. فربما اوامر اصدار النار على المتظاهرين كانت محدودة في بضع اماكن

وإن لم تكن مسؤولية رئيس الجمهورية الذي لم يصدر القرار .. فهي حتماً مسؤولية وزير الداخلية

إذن فنظرياً  أيضاً -  ونظرياً تشمل ما يمكنك اثباته بالدليل والبرهان – لا يوجد سبب لادانة مبارك على الثورة
بل أن الرجل آثر ترك منصبه حقناً لمزيد من الدماء (على حد تعبيره) وهي نقطة تحسب له في حالة الدفاع

الخطأ هنا .. كان في نوع المحاكمة اصلاً
فثورة انتهت بالتخلي عن الحكم وتسليم السلطة هي ليست ثورة

فالثورة هي عمل غير شرعي يترتب عليه بعض الاعمال الغير شرعية او الغير قانونية
مثل تولي شخص لم يكن له الحق في تولي المنصب – ومحاكمة المذنبين او المعزولين بمحاكمات غير شرعية ثورية


وجرم مبارك الحقيقي ليس في الف شخص ماتوا في احداث 25 يناير

ولكن في الاف كانت تموت يومياً إما في حوادث العبارات والقطارات في حوادث الطرق السريعة والمواصلات أو داخل سجون التعذيب ومعتقلات السياسيين أو من الفقر والقحط الذي يعيش فيه أكثر من نصف الشعب


كلها اسباب للادانة السياسية وللادانة بحكم المسؤولية .. سيصعب جمعها نظرياً لنترك الفرصة للقانون ليدينها



لنتعلم من التاريخ دروساً عدة .. في القانون وفي الدستور وفي الاحتكاك الشعبي والسياسي

ربما لا نشهد الثورة القادمة ... ولكننا سننقل تجاربنا لمن يمكن في يوم ماً ان يستفيد منها .

2015/03/15

بحث حالة .. لكن مميز !

4-2-2014


استقيظت هذا اليوم مبكراً
كنت اضع اللاب الخاص بي بجواري


قمت بفتحه ولازلت على سريري اتفقد يوم امس على "الفيس بوك"
فقد نمت مبكراً بعد اجهاد يوم أمس ولم احصل حتى على المعلومات التي احتاجها اليوم
كان اليوم موعدنا مع بحث حالة آخر لمشروع إنسان
كنت مسؤولاً عن مهام اليوم ولم اعرف بعد لمن سأنزل
ولكنني وصلت للبيانات التي اريدها والتي لا اريدها الحمد لله

اديت ما علي تأديته واستعددت للنزول حتى تذكرت انني لا امتلك ما يخص استمارات البحث
وصاحب هذه المهمة لم يكن موجوداً هذا اليوم

بحثت من بين اوراقي لعلي اجد بعضها فلم اجد
فتحت حاسوبي مرة اخرى لاحصل على الملف لعلي اقوم بطبعه
ولكنني حتى لم اجد الفلاشة

حسناً .. لا بأس 
يمكننا التصرف .. فنحن لم نعد جدداً في هذا المشوار
"واي كشكول حيأدي الغرض"


وصلت إلى هناك في تمام الساعة التاسعة والنص الا ثلاث دقائق
لست معتاداً على التأخر ما يزيد عن الربع ساعة
ولكن لا باس بذلك .. فلم يكن اجتماعاً ولم اتاخر عن موعد التحرك

لم اكمل الثلاث دقائق حتى سلمت على من كان حاضراً وجمعت فريقاً
وتحركنا في تمام التاسعة والنصف .. وهو موعد تحركنا 

وصلنا الموقف واتحركنا من هناك
قمنا بترديد دعاء تجديد النية داخل المواصلة
وفور ان انتهينا وجدنا "قرنبيطة" بتتحدف علينا من السما 

العربية وقفت ونزل السواق راح واخدها وهو راجع يركب راح منادي عليه واحد
السواق قاله بتاعتك ؟ طب خدها اهي (طبعاً بعد ما خدت الشارع كله مرمطة)

المهم وصلنا الحمد لله للموقف التاني بعد ما دفعنا للراجل فرق المسافة
ووصلنا موقف عربيات البوكس 

تتميز القرية اللى كنا نازلينها بان كل العربيات اللى بتوصلها 
عربيات ربع نقل متغطية .. زي عربيات البوكس

ودي كانت تجربة فريدة وممتعة جداً طبعاً للفريق اللى معانا

ياترى ايه الاختلاف بين نص الموضوع الاولاني بالفصحى 
والنص التاني اللى بالعامي ؟
انها القرنبيطة :D

المهم وصلنا بعد تلت ساعة غير التلت ساعة اللى كانت في الموقف الاولاني
نحن الان في قرية عرب القداديح بأبنوب

نزلنا هناك ولقيت واحد جنبي بيسلم عليا ... يبدو اننا نزلنا عليه مباشرة
اكيد ده اللى مستنينا .. اهلاً بحضرتك اهلا اهلا

اتقسمنا فريقين واتحركنا .. بنتوزع عالبيوت
ولفينا عالناس .. بنعمل بحث الحالة بتاعنا العادي

فريق كان مع الدليل والفريق التاني كان مع دليل بردو 
بس دليل عنده بتاع 10 سنين كدا لقيناه ف الطريق ^_^

أحد الحالات واحنا بنتكلم مع الست حماتها او سلفتها كانت معاها

وفضلت ترمي بكلام واحنا بنتكلم لحد ما اتخنقت وخدت الفريق ومشيت
فضلوا يعتذروا ويحاولو يرجعوني بس انا سبتهم ودخلت البيت اللى بعدهم

بعد ما خلصناه وانا راجع احصل الفريق التاني لقيت نفس البيت ده مسكو فيا تاني
الست ما شاء الله طول بعرض ومسكت فيا والنعمة لانت داخل 

مش المشكلة انها بتخطفني .. المشكلة مش قدام البنات اللى معايا :D
طبعاً انا بحاول بس مفيش اي عزم ف الموضوع

يا ستي عيب كدا ! يا ستي مينفعش ! طب خدي عشة جنيه وسيبيني !

المهم بعد محاولات .. وتدخل الراجل اللى كان معانا .. مشينا !


خلصنا الحالات اللى كنا بنلف عليها وابتدينا نستعد عشان نلم عزالنا ونمشي

الدليل قالنا لا مينفعش الاكل بيتجهز لازم تيجو تتغدوا
احنا متفقين على كدا من اول اليوم 
حقيقة هو انا متفقتش اوي .. هو اللى فرضه عليا 


واحدة من البنات كانت اول مرة تنزل معانا
بتقوله لا شكراً حضرتك احنا لازم نروح 

(لو مكنتش نزلت قرى الصعيد الجواني قبل كدا .. لازم تعرف ان جملة زي كدا ممكن يبقى فيها تار )

لقيته بصلهم متعصب كدا .. يعني ايه الكلام ده ؟ 
كنت انا ماشي جنبه وبقية الفريق ورايا 

بصتلهم فيما معناه .. امشو وانتو ساكتين احسنلكو :D

المهم دخلنا .. ومكنش الاكل بيتجهز ولا حاجة كان لسه حيتجهز 
فحاول حد م الفريق يعتذر تاني بس الحمد لله لحقته قبل ما يرتكب جريمته التالية واحنا في بيت الراجل

غسلنا ايدينا واتوضينا وصلينا 


وكان في معزتين صغيرين كدا قدام البيت خدناهم وقعدنا نلعب بيهم 
وحطيناهم جنبنا وقعدنا نتصور بيهم 

وكان شغال على التلفزيون مصارعة الـ WWE
كنت فاكر إني الوحيد اللى متابعها .. بس لقيت في واحدة من البنات كمان مهتمة جداً بيها !

المهم وصل الأكل .. 
الرز والملوخية والطبيخ والسلطة والفراخ والعيش
واتقفل علينا الباب .. عشان ناكل براحتنا .. ودخل هو جوه لمراته

انجزنا ف الاكل .. كل واحد اكل حاجة بسيطة م اللى كانت قدامه

 

وبعد ما خلصنا دخل هو علينا ... واتصدم 
احنا كلنا من كل حاجة بس محدش مد ايده عالفراخ 
(واللى ميعرفش بردو .. دي جريمة تانية :D)

ازاااااااااي محدش كل من الفراخ ؟ هي كانت وحشة ولا ايه ؟
تعالي يا حجة ... محدش كل م الفراخ !!!


لقيناها طالعة من جوه ... ايه ده ؟ محدش كل م الفراخ ؟
انتو شاكين فيا ولا ايه ؟؟؟!

- لا يا حجة والله تسلم ايدك 


- تسلم ايدي ايه انتو حد مد ايده عليها اصلاً !
ونزلت مسكت الفراخ وقطعت منها دبوس وتعدي على كل واحد تديله ورك ياكله

يا حجة شكراً .. والله شبعنا الحمد لله


لقينا جوزها بيبصلنا .. 
والله ما ينفع الكلام ده 
والله المرحوم لو كان قاعد كان طلع عليكو بالسلاح !


لقيت صاحبي راح خاطف الورك من ايديها ونزل عالارض قعد ياكله :D
بعد ما كلنا وكدا .. قلتله خلاص افراج ولا ايه :D

قالي لا لسه الشاي .. اهو الشاي داخل اهو 

( بصتلهم تاني ... خلي حد يعترض بقى :D )


شربنا الشاي وقمنا عشان نمشي 

قلتله .. قبل ما نمشي انا عايز منك حاجة بقى 
- اتفضل !
- عايز صورة معاك ^_^


وخدنا الصورة

اصل مكنش اليوم ده ينفع يعدي بدون ما يتحط عندي في الأرشيف
^_^

متسيبهاش لهواها

محتاجين نتعلم ناكل بس لما نجوع
ونشتري بس لما نكون محتاجين

بصيغة أخرى
نمد لحافنا على قد رجلينا

العالم دلوقتي ف القرن الواحد والعشرين
بينهار بسبب القروض .. بسبب إنك بتشتري باللى مش معاك

سواء بنظام بطاقات الكريديت كارد المفتوحة
او قروض جمعيات رجال الاعمال
اللى كل حد محتاج ياخد منها بدون ما يفكر ف خطوته الجاية ايه

الغريزة البشرية طماعة
ومن كان لديه واديان من ذهب تمنى ان يكون له ثلاث 

متسيبهاش لهواها
:)

2015/02/13

فيسبوكيات بنزرية : (1) اللايك

#فيسبوكيات_بنزرية
اللايك .. او الاعجاب

على الفيس بوك .. عندنا ليه استخدامات تانية خالص

فأحياناً بيكون اللايك دلالة على الإقرار بالأمر او الموافقة عليه
وأحياناً بيكون للتأكيد بس على انك عديت عالبوست او قريت الملحوظة اللى متوجهالك
زي الـ
Seen  كدا في الشات بالظبط 

بس ده كلو ممكن يكون عادي
الافتكاسة بقى هي ف مسابقات اللايكات
مثلاً
انت مع الاهلي ولا مع الزمالك ؟
لو اهلي دوس لايك ولو زمالك حط كومنت
وطبعاً لان اللايك اسهل بكتير .. فأكيد الأهلي هو اللى حيفوز
بغض النظر عن اننا لو عكسنا فالاهلي هو اللى حيفوز بردو

أما النوع التاني من المسابقات
وهو
اكتر كومنت حياخد لايكات حيبقى الفايز او حنعرض صورته
وتلقى كل واحد بيبعت للفريندس بتوعه .. والنبي لايك .. ادعم اخاك ف الله .. محتاجين لايكاتكو هنا
النوع ده من الرسايل غالباً بكتفي باني بس اقفل الرسالة دون رد حفاظاً على العلاقات اللى موجودة مش اكتر

نيجي بقى لاكتر ظاهرة منتشرة على الصفحات
جامعوا اللايكات

عايز كومنتك يبقى اعلى كومنت عليه لايكات ؟
إليك النصائح الآتية

-  حاول كومنتك يكون اول كومنت يتحط عالبوست
البوست وهو سخن بتلاقيه نازل بلايكاته معاه
لو كومنتك مساعد .. حتحظى بنصيب وفير من اللايكات دي
-  حط اي جمل دينية ف الموضوع
حتى لو كانت بس .. صلي على النبي
 "عليه أفضل الصلاة والسلام"
حيث اننا شعب متدين بطبعه
فنصيب اللايكات الدينية غالباً حيكون كبير
- احكي قصة مؤثرة .. مش لازم يكون ليها علاقة بالبوست
كدا كدا مش حتلقى كومنتات ليها علاقة بالبوست
بس المهم انك تأثر ف الناس ويا حبذا لو حطيتلك حكمة كدا او نصيحة ف الاخر

- لو انت بقى فاضي وبتحب السهوكة
عليك بالمطالبة باللايكات بشكل صريح
حط الكومنت وقول فيه بس انك نفسك تجرب يبقى عندك لايكات كتير
ولاد الحلال كتير .. وحيقفوا جنبك وحيدعموك
ويا سلام لو كنتي بنت .. او بتدعي انك بنت .. مش حتبقى لايكات بس
كومنتات ورسايل .. واضافات (ادد)  كمان
وده لإن المشاركة المجتمعية شيء متأصل دايماً فينا 

وطبعاً مملكة الفيس هو المكان الانسب عشان "المشاركة" دي

أهم حاجة .. متدايقش ان لايكاتك قليلة .. او فلان لايكاته اكتر
لايك واحد من حد مهم عندك لبوست مهم ليك
احسن من 50 لايك على بوست هايف لواحد صاحبك من 50 واحد هو مقابلش منهم غير 5 
وعلاقته بيهم مش اوي

تجنب ادمان اللايكات .. وتبنى شعار
#اعجابك_وحده_مش_كفاية .. محتاجينك بشيرك وكومنتاتك علينا

2015/02/07

مع إيمان الدواخلي .. الروائية بمعرض الكتاب

كنا في معرض الكتاب في القاهرة

حينما خرجت من امام خيمة 3
حيث كان الواقفون في طوابير ينتظرون النسخ المجانية 
من الكتب التي توزعها دار "عصير الكتب" امام خيمتهم

وكواحد من الشعب المصري 
كان لابد من ان نشاركهم هذا الطابور ^_^

كانت رواية "أذان السندباد" للراوية "إيمان الدواخلي"
صحيح انه موزع هذه الكتب من الدار هو صديقي
ولكن لا داعي لان اختصر 4 دقائق من الانتظار في طابور سريع

كاتبة هذه الرواية كانت خلفنا تجلس على"النجيلة" مع صديقتها الروائية ايضاً
وكان الشباب يأخذون رواياتهم ويتجهون إليها لتكتب إليهم كلمة عن كتابها

أخذت كتابي وأبيت ان افعل مثلهم 
فلست من هواة جمع التوقيعات والتصوير مع المشاهير وما الى غير ذلك
ولكن حيث أنني لا افعل شيئاً ف الوقت الحالي
فبقيت مع اصدقائي اشاهدهم وقلت لصاحبي 

خلينا للاخر .. لو خلصت ولسه قاعدة نروحلها .. لو مكنش خلاص فاكس 

كان الشباب اولاداً وبناتاً يتجمعون حولها ويسارعون من تمضي له ثم يرحل
اخذ صديقي روايتي وذهب بالاثنين ليمضيها باسامينا حيث انني لا افضل الذهاب

حتى اذا تبقى اخر من كان يكتب .. فقمت وتمشيت حتى وقفت بجواره واستعدت روايتي منه
وقدمتها للكاتبة
ودار بيننا هذا الحديث

- لسه في تاني ؟ .. دنا مصدقت خلصت
- معلش .. لسه معدتيش عليها ^^
(سأتني وهي ممسكة بالقلم وتنظر إلى الورقة) 
- ماشي .. اسمك ايه بقى ؟
- بانزر خضر
- (رفعت رأسها هي وزميلها) با ... ايه ؟
- (بابتسامة) بانزر  .. ب ا .. ن ز ر .. خضر
- وده معناه ايه ؟
- just a nickname .. ملوش معنى
ويتابع صديقي بجواري تفسير قصة الاسم فانكزه بيدي بان لا داعي للاستفاضة ^_^
- اه .. اصل انا و(زميلها)* مصححين لغويين فاستغربنا الاسم 

واستطردت تكتب كلمتها على الرواية وقالتلي في ختامها : شوف دي بقى

كانت الكلمات كما هي في الصورة كالآتي

بما إنك من هواة الـ Nicknames 
طيب الرواية دي بقى مخادعة جداً
حنشوف مين اللى حيغلب 
إيمان الدواخلي

تناولت منها الرواية وقبل ان انهض قرأت كلماتها
فابتسمت ابتسامة مصحوبة بضحكة خافتة 
وقلت لها بلهجة صعيدية ساخرة 
"جميل ... ماشي ^_^"