خلصت سلسلة المهاترات السياسية ؟ تظاهرت وشتمت واعتصمت ؟
عشت دور الوطني اللى بيحب بلده وبيحارب لاسقاط الفساد ؟
قولي بقى
كام مرة طلعت معاكس عشان تسبق الطابور ورحت قافل عاللى في وشك والشارع اتقفل بسببك ؟
كام مرة كسرت اشارة مش بيبقى واقف عليها العسكري وعملت فيها فهلوي ؟
كام مرة قبلت رشوة او خدت حق حد تاني بالكوسة ؟
كام مرة رميت ربالة في الشارع ولا رسمت على حيطة ولا كسرت اي حاجة رغم انك عارف انها ممتلكات عامة ؟
كام مرة عليت الصوت في البيت او في الشارع او بالعربية وعملت ازعاج رغم انك كل يوم بتشتم في اللى بيعمل كدا ؟
كام مرة كنت سبب في الانحطاط الاخلاقي الموجود في الشارع سواء بلفظ او باسلوب او بمعاكسة او حتى بمنظر لبسك ؟
كام مرة فكرت تمنع ده سواء عالمستوى الشخصي او على مستوى الغير ؟
تفتكر الفساد ده كلو واحد او اتنين بس اللى مسؤولين عنه ؟
متوقع انك بالمنظر ده حتكون سبب فعلاً في اسقاط الفساد اللى انت جزء منه ؟
لسه مستغرب الفساد طلع اكبر واعمق مما كنت متخيل من سنتين ليه ؟
الفساد مش حيسقط باسقاط راس النظام ولا بافراد حكومة ولا حتى بتغيير المحافظين
الفساد ده اسلوب حياة بيمثلنا كلنا وكلنا مشاركين فيه
قبل ما تقول لغيرك يا فاسد وتتهمه بإنه سبب اللى حاصل
بص لنفسك وشوف انت افسدت زيه في حق نفسك قبل ما يكون في حق بلدك قد ايه
قبل ما تدعي الوطنية وتقول انا بحب بلدي اسأل نفسك انت قدمت لبلدك ايه
النظام .. مش حينصلح حاله غير لما احنا نطبق .. النظام
ليست هناك تعليقات:
إرسال تعليق