متسيبهاش لهواها

محتاجين نتعلم ناكل بس لما نجوع
ونشتري بس لما نكون محتاجين

بصيغة أخرى
نمد لحافنا على قد رجلينا

العالم دلوقتي ف القرن الواحد والعشرين
بينهار بسبب القروض .. بسبب إنك بتشتري باللى مش معاك

سواء بنظام بطاقات الكريديت كارد المفتوحة

او قروض جمعيات رجال الاعمال

اللى كل حد محتاج ياخد منها بدون ما يفكر ف خطوته الجاية ايه

الغريزة البشرية طماعة

ومن كان لديه واديان من ذهب تمنى ان يكون له ثلاث 

متسيبهاش لهواها

:)

فيسبوكيات بنزرية : (1) اللايك

#فيسبوكيات_بنزرية

اللايك .. او الاعجاب

على الفيس بوك .. عندنا ليه استخدامات تانية خالص

فأحياناً بيكون اللايك دلالة على الإقرار بالأمر او الموافقة عليه

وأحياناً بيكون للتأكيد بس على انك عديت عالبوست او قريت الملحوظة اللى متوجهالك
زي الـ Seen  كدا في الشات بالظبط 

بس ده كلو ممكن يكون عادي

الافتكاسة بقى هي ف مسابقات اللايكات

مثلاً

انت مع الاهلي ولا مع الزمالك ؟

لو اهلي دوس لايك ولو زمالك حط كومنت

وطبعاً لان اللايك اسهل بكتير .. فأكيد الأهلي هو اللى حيفوز

بغض النظر عن اننا لو عكسنا فالاهلي هو اللى حيفوز بردو

أما النوع التاني من المسابقات

وهو

اكتر كومنت حياخد لايكات حيبقى الفايز او حنعرض صورته

وتلقى كل واحد بيبعت للفريندس بتوعه .. والنبي لايك .. ادعم اخاك ف الله .. محتاجين لايكاتكو هنا

النوع ده من الرسايل غالباً بكتفي باني بس اقفل الرسالة دون رد حفاظاً على العلاقات اللى موجودة مش اكتر

نيجي بقى لاكتر ظاهرة منتشرة على الصفحات

جامعوا اللايكات

عايز كومنتك يبقى اعلى كومنت عليه لايكات ؟

إليك النصائح الآتية

-  حاول كومنتك يكون اول كومنت يتحط عالبوست
البوست وهو سخن بتلاقيه نازل بلايكاته معاه

لو كومنتك مساعد .. حتحظى بنصيب وفير من اللايكات دي

-  حط اي جمل دينية ف الموضوع

حتى لو كانت بس .. صلي على النبي
 "عليه أفضل الصلاة والسلام"

حيث اننا شعب متدين بطبعه

فنصيب اللايكات الدينية غالباً حيكون كبير

- احكي قصة مؤثرة .. مش لازم يكون ليها علاقة بالبوست

كدا كدا مش حتلقى كومنتات ليها علاقة بالبوست

بس المهم انك تأثر ف الناس ويا حبذا لو حطيتلك حكمة كدا او نصيحة ف الاخر

- لو انت بقى فاضي وبتحب السهوكة

عليك بالمطالبة باللايكات بشكل صريح

حط الكومنت وقول فيه بس انك نفسك تجرب يبقى عندك لايكات كتير

ولاد الحلال كتير .. وحيقفوا جنبك وحيدعموك

ويا سلام لو كنتي بنت .. او بتدعي انك بنت .. مش حتبقى لايكات بس

كومنتات ورسايل .. واضافات (ادد)  كمان

وده لإن المشاركة المجتمعية شيء متأصل دايماً فينا 

وطبعاً مملكة الفيس هو المكان الانسب عشان "المشاركة" دي

أهم حاجة .. متدايقش ان لايكاتك قليلة .. او فلان لايكاته اكتر

لايك واحد من حد مهم عندك لبوست مهم ليك

احسن من 50 لايك على بوست هايف لواحد صاحبك من 50 واحد هو مقابلش منهم غير 5 

وعلاقته بيهم مش اوي

تجنب ادمان اللايكات .. وتبنى شعار

#اعجابك_وحده_مش_كفاية .. محتاجينك بشيرك وكومنتاتك علينا

مع إيمان الدواخلي .. الروائية بمعرض الكتاب

كنا في معرض الكتاب في القاهرة

حينما خرجت من امام خيمة 3
حيث كان الواقفون في طوابير ينتظرون النسخ المجانية 

من الكتب التي توزعها دار "عصير الكتب" امام خيمتهم

وكواحد من الشعب المصري 

كان لابد من ان نشاركهم هذا الطابور ^_^

كانت رواية "أذان السندباد" للراوية "إيمان الدواخلي"

صحيح انه موزع هذه الكتب من الدار هو صديقي

ولكن لا داعي لان اختصر 4 دقائق من الانتظار في طابور سريع

كاتبة هذه الرواية كانت خلفنا تجلس على"النجيلة" مع صديقتها الروائية ايضاً

وكان الشباب يأخذون رواياتهم ويتجهون إليها لتكتب إليهم كلمة عن كتابها

أخذت كتابي وأبيت ان افعل مثلهم 

فلست من هواة جمع التوقيعات والتصوير مع المشاهير وما الى غير ذلك

ولكن حيث أنني لا افعل شيئاً ف الوقت الحالي

فبقيت مع اصدقائي اشاهدهم وقلت لصاحبي 

خلينا للاخر .. لو خلصت ولسه قاعدة نروحلها .. لو مكنش خلاص فاكس 

كان الشباب اولاداً وبناتاً يتجمعون حولها ويسارعون من تمضي له ثم يرحل

اخذ صديقي روايتي وذهب بالاثنين ليمضيها باسامينا حيث انني لا افضل الذهاب

حتى اذا تبقى اخر من كان يكتب .. فقمت وتمشيت حتى وقفت بجواره واستعدت روايتي منه

وقدمتها للكاتبة

ودار بيننا هذا الحديث

- لسه في تاني ؟ .. دنا مصدقت خلصت

- معلش .. لسه معدتيش عليها ^^

(سأتني وهي ممسكة بالقلم وتنظر إلى الورقة) 

- ماشي .. اسمك ايه بقى ؟

- بانزر خضر

- (رفعت رأسها هي وزميلها) با ... ايه ؟

- (بابتسامة) بانزر  .. ب ا .. ن ز ر .. خضر

- وده معناه ايه ؟

- just a nickname .. ملوش معنى

ويتابع صديقي بجواري تفسير قصة الاسم فانكزه بيدي بان لا داعي للاستفاضة ^_^

- اه .. اصل انا و(زميلها)* مصححين لغويين فاستغربنا الاسم 

واستطردت تكتب كلمتها على الرواية وقالتلي في ختامها : شوف دي بقى

كانت الكلمات كما هي في الصورة كالآتي

بما إنك من هواة الـ Nicknames 
طيب الرواية دي بقى مخادعة جداً

حنشوف مين اللى حيغلب 

إيمان الدواخلي

تناولت منها الرواية وقبل ان انهض قرأت كلماتها

فابتسمت ابتسامة مصحوبة بضحكة خافتة 

وقلت لها بلهجة صعيدية ساخرة 

"جميل ... ماشي ^_^"

THE CHOOSEN ONE

تذكرت مشهداً من فيلم Matrix الجزء الاول
كان البطل "نيو" تايه ومش فاهم حاجة
وأخده المعلم بتاعه "مورفيوس" للعرافة "التي تعلم كل شيء"
عندها القدرة على التنبؤ وعلى درجة عالية من المعرفة
نيو كان عنده اقتناع تام انه معندوش قدرات خاصة وانه مش "المختار" ..
ولما راح للعرافة قالتله نفس الكلمتين .. "انت لست المختار !"
وأتبعت .. "لكن القدر بين يديك ويمكنك تغييره"
نيو لما رجع لمورفيوس قاله متعرفنيش قالتلك ايه .. احتفظ بده لنفسك
لانه كان متأكد من هدفه ومش مستني معلومة تغير مصيره
وفي لحظة لاحقة لما صارح نيو مورفيوس باللى قالته العرافة انه مش المختار
قاله .. "العرافة بتقولك بس اللى انت كنت عايز تسمعه !"

هو ده اللى بيحصل معاك بالظبط
كل اللى بيحصل معاك انت بتفسره حسب ما انت بتبقى عايز تشوفه
بتترجم كل حاجة بتحصل على انها عنك او ضدك حتى لو مكنتش تقربلك اصلاً
حتى الاحلام اللى بتحلمها هي مجرد الاحلام اللى انت عايز تشوفها
او (اللى انت بتحلم بيها) فعلاً .. او اللى متخيل حدوثه

الواقع بين ايديك .. وتقدر انت اللى تغيره
محدش مختار بعد الأنبياء .. لكن انت تقدر بتميزك تكون "المختار"

كل ما بتكرر حلمك بتبدي تنسى انه كان حلم ويبتدي عقلك الباطن يتعامل معاه كواقع ..
حتى على المستوى الجماعي
لما مجموعة معينة تفقد الامل في مشروع ما ويخيم عليهم هذا الشعور
كلهم بيفشلوا
ولو سكان البلد اقتنعوا ان البلد لسه فيها امل .. لازم البلد حتتغير

خلي تفكيرك واحلامك دايماً ايجابية .. حتلاقيها بتتحول لوحدها لواقع
والواقع لسه عندك عشان تغيره .. مش لازم تستنى تكون "المختار"

عالم وهمي

في عالم وهمي هو أحقر من ان نلتفت فيه لأنفسنا
تغيب فيه اعيننا عن واقع يسوقنا خلف ملذاته الآنية
نستحضر فيه الضحكة في وقت نسي فيه آخرون شكل الابتسامة
.
قبلنا فيه ان ننام ممتلئة بطوننا
وملايين تحاول تدبير ما يبقيها على قيد الحياة من الماء
.
في عالم وهمي .. حيث يطول بنا الحلم حتى نصدقه
في دنيا زائلة نضحي فيها برصيدنا من اجلها
.
تعتقد ان الامر يدور حولك بينما انت من يدور حوله
تحاول الاخذ بالاسباب غير مدركٍ أنك لست إلا سبباً لمسبب اخر
تبحث عن المتعة المجردة ولا تبحث عن خالق المتعة
.
ربنا لقد ضللنا الطريق فاهدنا إلى صراطك المستقيم 

ثورة اخلاقية

في ظل اعلى معدلات الانحلال الاخلاقي التي يمر بها المجتمع الان
من التراشق بالالفاظ النابية ومن استخدام الكلمات والصور الخادشة ومن الايحاءات والتعبيرات التي اصبحت سلوانا
وصولاً إلى تحريم ما حلل الله و تحليل ما حرم الله من فسق اصبح ينتشر للعلن
واصبح هناك من يبرره ومن يدافع عنه

الواحد هرب من التلفزيون ومن تدهور اخلاق الشارع
بقى الفيس كمان بهذه الدرجة من العفانة الاخلاقية !

ثورة ايه دي اللى لسه قاعدين بنتكلم عنها وبنفكر قال نصلح البلد
ثورة ايه دي اللى نص اللى كانوا نازلينها عشان يظبطو والنص التاني كان نازل يتفرج م الفضول
اللهم الا الكام واحد اللى كانوا فعلاً شايلين القضية

لا يحدثني احدكم عن ثورة قبل ان يحدثني عن ثورته لنفسه !

#ثورة_اخلاقية
#كان_عندك_ثورة_وراحت
#جاتكم_القرف_مليتو_البلد

توصية عاجزة

في الاسبوع السابق
نزلت في جولتي المعتادة للاسرة التي كنت اعمل على رعايتها في اسرة ضمن اسر مشروع إنسان

قمت بجولتي إلى قطعة الارض التي قام عم احمد بشرائها لبناء منزله الجديد بها
قمت بمعاينتها وتصويرها وشرح لي ما اتفق عليه فيها 
وانتهينا وعدنا إلى بيته لاطمئن على الآخرين

ونظراً لضيق الوقت حيث انني قد نزلت متأخراً
فقد قمت بالمكوث قليلاً حتى اطمأننت على الاولاد وعلى اخته المريضة
وهممت بالخروج فإذا بعم احمد يناديني من الغرفة المجاورة ويطلب مني الدخول

إن أمه العجوز من كانت تطلبني 

دخلت إليها في واحدة من ثلاثة مرات التي قمت بالدخول إليها منذ أتيت إليهم من عام
امه هي امرأة مقعدة لا تستطيع الحراك .. تعيش على نواع مختلفة من العلاج 
ولا تسألني عن امراضها لان معلوماتي الطبية المحدودة تعوقني عن حصر ما لديها من امراض

كانت المرتين السابقتين مرة عندما كنت اتعرف عالاسرة لاول مرة 
والاخرى عندما كنا نبحث في احد المرات التي كانت حالتها متأزمة بسبب الربو وكحة الصدر

دخلت إليها وهي تحاول ان ترمي بنظرها لتراني ادخل من الباب 
اقترت منها وانحنيت إليها واخذت تحاول ان ترفع يدها لتمسكني
فأمسكت يدها وضممت عليها بيداي ونظرت إليها
إنها منكمشة داخل سريرها قد فعل فيها المرض ما فعل
ومتقلصة لدرجة أنها اصبحت لا تتعدى نصف سريرها مساحةً

سلمت عليها واقتربت منها واخذت تقول لي
خلو بالكو من احمد .. بوصيكو على احمد .. خلو بالكم منه
حقيقة لم اتوقع مثل هذه الكلماتظ

فلازلت صغيراً على أن يوصيني أحدهم على من هو في سن والدي او اصغر قليلاً
ابتسمت إليها ورددت عليها قائلاً
في عينينا يا حجة متقلقيش 
وهي تعيدها لي مرة أخرى وتكررها وتدعو لنا وتشكرنا والدموع بالكاد تجد سبيلها للخروج 
وانا اطمئنها مرة تلو الأخرى
وهي تكررها حتى انني لم اعرف اانتظرها تنتهي حتى ارحل
ام هي تنتظر رحيلي حتى تنتهي 

كانت خمس دقائق ولكنها مرت علي كخمس ساعات من التفكير 
قد اكون شاهدت هذا الموقف في نهايات بعض الأفلام ولكنني لم اتعرض له قبلاً
وربما لن اتعرض لمثل هذا الموقف قبل خمسون عامة إن قدر لنا الله الحياة
شعرت بلحظات النهاية ... فلأول مرة منذ عام تطلبني لتسألني او تطلب مني شيئاً
فهي عادة غير قادرة على الحراك او على الكلام
وقد وصلت إلى المرحلة التي يقولون عنها .. الموت أرحم عليهم من الحياة
ولكن بالطبع لن نكون أرحم على خلق الله من الله 
ومن يعلم من اي تاتي حكمة الله
فقد يكون سبب وجودها بان يدخل اهلها بها الجنة بسبب برهم بها رغم ضيق امرهم
او لاحصل منها على دعوة جميلة مثل التي حصلت عليها هذا اليوم

ارحمنا اللهم برحمتك واعفنا مما ابتليت به غيرنا
ولا تحملنا ما لا طاقة لنا به إنك انت العفو الغفور
اللهم لا تحرمنا نعمة الاستخدام ولا تحرمنا مساعدة الغير
فما السعادة إلى انعكاس مردود مساعدة الغير على نفوسنا